منتديات قلب العراق
العودة  

منتدى الابوذيات والزهيريات والدارميات يختص بالابوذيات والزهيريات والدارميات فقط

  #1  
قديم 10-05-08, 11:08 PM
فيلسوف الحب غير متواجد حالياً فيلسوف الحب
المشاهدات: 7440 | التعليقات: 5

دارميات بقلمي على الجرح


دارمــــــــــــــيات
=============
لاتگطع اترجاك
سمعني كلمة
والله الهوه بلياك
مايسوه اشمه
==============
لاتظن يوم انساك
يالمني بيه
ماي انته ومباريك
بثنين اديه
===========
سهران افكر بيك
ماشايف النوم
وتخيلت مرسوم
وجهك بالنجوم
=============
ينراد اخلي اعيون
بعيوني ذني
حته اگدر ابچي اعليك
من تمشي عني
================
هدني التعب يفلان
والهم أكلني
من غيبتك لليوم
محد فگدني
================
نمت آنه عالتبريد
حسبالي أغفه
نار المحب بحشاي
ماترضه تطفه
==============
أصفن واعد انجوم
وايدي اعله خدي
هم غربة هم افراگـ
هم ولفي ضدي
==============
للدوم اظل وياك
يالطيبك ايفوح
ولخوتك ماعوف
لو تطلع الروح
==============
غيرة وكرم واخلاص
كلهن صفاتك
واتعب شوصف بيك
يالطيبة ذاتك
==============
صدگني آنه اوياك
روح بوسط روح
گبلك أحس بالآه
لو إنته مجروح
==============
تدري شوكت أنساك
وبگلبي اتهون
من تسمع آنه اهناك
بالنجف مدفون
==============
حسبالك آنه انساك
يالتسوه كلشي
تسوه العدل والمات
والتوه يمشي
==============
عبوة وزرعني الشوگـ
صرت اعله دربك
واعذرني لو طگيت
فجرني حبك
==============
تدري شوكت أنساك
ياأغله الاحباب
لمن يجيني الموت
واتغطه بتراب
==============
لعيونك الحلوات
صدگني أشتاگـ
ماأصبر بلياك
واتحمل افراگـ
==============
كون الجمال البيك
أتمنه بيه
حته آنه من اشتاگـ
أصفن عليه
==============
غالي وعزيز اهواي
وفراگك اهموم
وعيوني لو تنساك
أعميها للدوم
==============
حاير شحط للعين
وامنعها منكم
صبح وعصر وغروب
تسألني عنكم
==============
عيون البشر حلوات
بس عينك احله
خظرة وتسلب اعقول
لو تحط كحله
=============
ظلمة وتريد الناس
توصل للبيوت
بس آنه اريد الگاك
هالساعة لو موت
==============
گالولي اجاك العيد
چا ليمته اتهيد
عيد اليمر بجفاك
ماينحسب عيد
==============
تدري آنه گبل العيد
عاشورك اوياي
حاسمها لو مو عيد
ماتضحك اشفاي
==============
يم بيتي بيتك كون
واشمرلك العين
تشبعها منك شوف
وتردها بعدين
==============
صايم على فرگاك
غيرك فلا اريد
أفطر أنه بملگاك
وك شوفتك عيد
==============
أتعارك اويه النوم
بلكي اغفه وانساك
تاليها صورة وصوت
إبحلمي الگاك
==============
باخر نفس مخنوگـ
واتمنه اشوفك
واعذرني بس الموت
يجبرني اعوفك
==============
نامت اگلوب الناس
بس گلبي گاعد
والضغط من فرگاك
كل ساعة صاعد
==============
للموت اضل وياك
ماابدل الراي
وافدي الجسد والروح
لليوفي وياي
==============
بالگلب ساكن دوم
مايمكن انساك
يهجرني حته النوم
من يمر ذكراك
==============
إرهابي ليش اصير
مو إنته حباب
فجرت گلبي اشبيك
سويته عطاب
==============
الخوة شحت حيل
صارت قليلة
لكن وحگ عيناك
خوتنه اصيلة
==============
ليل وشتى وبردان
ماتدري حگك
ماأدفى حته بنار
أدفه امن اشبگك
==============
أصفن واحاچي الروح
وين احنه چنه
هم ترجع الأيام
ويلتم شملنه
==============
ناذر نذر لو جيت
وتشوفك العين
أگعد أجدي اسبوع
اباب الحسين
==============
سيطرة بدرب اهواي
وهمية أنصب
حته امن اشوفه ايفوت
أخطفه وأهرب
==============
شريان الك بالروح
يمشي بغزارة
وحبك بگلبي دوم
ماتطفه ناره
==============
مل مني حته الليل
والگمر شاهد
بس بيك افكر دوم
للفجر گاعد
==============
مذنب أظل بهواك
كون انته قاضي
تحكمني بالإعدام
صدگني راضي
==============
اتريله الك بوسات
تحملها العيون
حضر خمس عمال
بس اليفرغون
==============
أخطب بنص الناس
والساحة تشهد
وافرض حضر تجوال
لو غثك احد
==============
صدگوني مامرتاح
يالروحي عدكم
لو أدري هيچ اشتاگـ
ماعاشرتكم
==============
الروح اذا تنساك
ميتة اعتبرها
وبيسرتي ويمناي
أحفر گبرها
==============
مسكنك روح الروح
ياشمعة العين
ومن كل خطر يحميك
مولاي الحسين
==============
للصحبة أهدي الروح
وعيوني الاثنين
والعمر فدوة ايروح
للصاحب الزين
==============
دايخ وافكر بيك
وعن بالي متروح
أمشي وردمني الباب
حسبالي مفتوح
==============
صابر على فرگاك
گلبي اليريدك
والصبر يالمحبوب
مفتاحه بيدك
==============
لاتسأل اعله الحال
خليها سكتة
تسأل على المكتول
والكاتل انته
==============
لو ممشة عشر اسنين
أمشيها واكثر
ماأتعب وماجوز
من حب الاسمر
==============
روحي بسرير الموت
تنشدني عنك
وتگلي ليش اهواك
متبري منك
==============
يالبلگلب مشتول
وبروحي مزروع
افراشك النبضات
وغطاك الظلوع
==============
ياجوري يانعناع
يانبع صافي
لاخر نفس بالروح
ليك ابقه وافي
==============
غير الوفه يهواي
ماعندي غاية
وآنه اعله عهدي اوياك
حد النهاية
==============
كون الفرح ينباع
واشريلك العيد
يالشوفتك عيدين
عيد احله من عيد
==============
أسأل أضل اعليك
حد گطع الانفاس
غالي وتضل بالروح
تاج انته عالراس
==============
تبقه انته تاج الراس
تبقه انته راقي
يالريحتك بغداد
واسمك عراقي
==============
كون الحبيب ايصير
بالحمزة دنگة
وبحجة الزوار
كل ساعة اشبگة
==============
صح البشر حلوين
بس الك ميزة
تدخل گلب تهريب
وبليه فيزة
==============
أتمنه هالطلاب
كلهم ينجحون
چيفن حبيب الروح
ويه اليدرسون
==============
گتلك تفضل فوت
كل قصدي للبيت
رأسا دفعت الباب
وبگلبي طبيت
==============
الموضوع الأصلى من هنا: منتديات قلب العراق http://www.qalbaliraq.net/vb/showthread.php?p=46617
تمثال الك بالعين
شايلته الجفون
نافورة منه وبيه
دمعات العيون
==============
من غبتوا ولهاليوم
أحلامي بيكم
وصدگوا مثل هوار
أبچي عليكم
==============
ظلمة ودرب عاثور
والدنيه تمطر
لغيرك فلا تانيت
بس الك أنطر
==============
طيفك نبض بالعين
كل ليلة ضيفي
بعيونك الحلوات
هم يمر طيفي
==============
أهلا وسهلا بيك
صارت قديمة
أفرشلك العينين
والگلب خيمة
==============
اشما تگول الناس
عندي انته الاول
سو كلشي بالدلال
ياحلو مخول
==============
دم الگلب بجفاك
فاض من العيون
مو حب طبيعي اهواك
بيك آنه مجنون
==============
أنشد عليك الروح
مدري اشتگلي
مدري انته نص الروح
مدري انته كلي
==============
لاتظن يوم انساك
لو يوم اعوفك
صدگني ابيع الروح
بس كون اشوفك
==============
كون المحبة اصير
مثل السياسة
حته اليخون ابساع
ينگطع راسه
==============
كلمن يگول انساك
گله انته مجنون
هو الگمر ينشاف
من غير العيون
==============
كلمن ينام الليل
مايعرف ايحب
آنه بحلات النوم
وعيوني اتصب
==============
لو گلبي عافك يوم
سويته تكه
وللمكتب استدعاء
بالبطة اصكه
==============
يهتز يريد ايطيح
گلبي اعله فرگاك
لايرضه جرحي ايطيب
لايرضه ينساك
==============

  #2  
قديم 10-05-12, 10:02 PM
مـَ‘ؤٍيـِّّد إْلكرٍبلآ‘إْئـِّّيـﮯ غير متواجد حالياً مـَ‘ؤٍيـِّّد إْلكرٍبلآ‘إْئـِّّيـﮯ

طرح جميل ابداع راقي

جميل جداً شخصك

لختيار هذه الكلمات

تقبل مروري وننتظر جديدك

بشغف تقبل مروري

كنت هنا
<!-- / message -->
  #3  
قديم 10-05-14, 01:12 PM
●شـﮧـًمِـِﮩِـوِخِ آِنِـِﮧـِﮩِسِـِآنه● غير متواجد حالياً ●شـﮧـًمِـِﮩِـوِخِ آِنِـِﮧـِﮩِسِـِآنه●









كلمات جميله تعبر عن احساس صاحبها
تحياتي
تقبل مروري
  #4  
قديم 10-05-25, 04:34 AM
غزالة الحرمين غير متواجد حالياً غزالة الحرمين

  #5  
قديم 10-05-25, 04:38 AM
ابو عذاب غير متواجد حالياً ابو عذاب

يسلمووو على الموضوع الرائع سلمت الايادي

طرح رائع وابداع متواصل

لاتحرمنا من الجديد

تقبل اجمل تحياتي

ابو عذاب

مواقع النشر (المفضلة)

الكلمات الدلالية (Tags)
الجرح, بقلمي, دارميات, على

جديد منتدى منتدى الابوذيات والزهيريات والدارميات

أدوات الموضوع


المواضيع المتشابهه للموضوع: دارميات بقلمي على الجرح
الموضوع
بقلمي : دارميات
دارميات جديدة (بقلمي)
دارميات بقلمي طب وشوف

الساعة الآن 07:31 AM
Powered by vBulletin® Version 3.8.7
Copyright ©2000 - 2014, Jelsoft Enterprises Ltd.


صور كوكل ياهو مكتوب الابراج اليوم شعر شعبي عراقي نتائج امتحانات الدور الثالث صور تحشيش برجك اليوم نانسي عجرم صبايا العراق غرف نوم الابراج حفلات عراقية تحشيش كوكل كروم شعر غزل ابراج اليوم 2012 شهد الشمري توقعات الابراج لشهر ديسمبر 2012 , توقعات الابراج لشهر